Արցախի Մարտունու ուսումնարանն անվճար տաք ջուր և էլեկտրաէներգիա կունենա

Մարտունու Վ․ Խաչատրյանի անվան արհեստագործական ուսումնարանն ամբողջությամբ կանցնի արևային էներգետիկայի՝ ապահովվելով մշտական տաք ջրով և էլեկտրաէներգիայով։

Խոշոր նվիրատվությամբ Shtigen Group-ի «Արևածագ Արցախում» նախագծին է միացել Telcell ընկերությունը. ամանորի կորպորատիվ նվերների փոխարեն Արցախի արևածագին հատկացված 7.4 միլիոն դրամը կուղղվի Մարտունու արհեստագործական ուսումնարանի լիակատար արևայնացմանը։

Telcell ընկերությունը, շուկայում դիրքավորվելով որպես վճարահաշվարկային ազգային օպերատոր, կարևորում է համայնքային զարգացման ծրագրերին աջակցությունը։
Telcell ընկերության գլխավոր տնօրեն Համբարձում Դանելյանն ասել է, որ իրենց գործընկերների հետ միասին որոշել են ներդրում ունենալ Արցախի երիտասարդների մասնագիտական զարգացման գործում։

«Էներգետիկ անկախությունը ներկայում կարևորագույն առաջնահերթություններից է Արցախի համար։ «Արևածագ Արցախում» նախագիծը կենսական հարց է լուծում․ արևային վահանակների և ջրատաքացուցիչների շնորհիվ Մարտունու արհեստագործական ուսումնարանը կապահովվի էլեկտրաէներգիայով և տաք ջրով․ դա կնպաստի կրթօջախի բնականոն գործունեությանը»,-ասել է Telcell ընկերության գլխավոր տնօրեն Համբարձում Դանելյանը:

Ուսումնարանում 2023-ի տարեսկզբին կտեղադրվի հիբրիդային ֆոտովոլտային կայան և 2 արևային ջրատաքացուցիչ, որոնց շնորհիվ կրթարանը կունենա մշտական անվճար տաք ջուր և էլեկտրաէներգիա։

«Մեզ համար գնահատելի է, որ խոշոր ընկերությունները գիտակցում են ռազմավարական նշանակության այս ծրագրի կարևորությունը։ Telcell-ն այս իմաստով եղավ առաջամարտիկ՝ ցուցաբերելով կորպորատիվ ազգային պատասխանատվության օրինակելի վարքագիծ»,-ասել է Shtigen Group-ի հիմնադիր տնօրեն Հայկ Շեկյանը։

«Կրթությունն ազգի առաջընթացի, զարգացման առաջին նախապայմանն է, դրան նպաստելը՝ պարտավորություն ու պատասխանատվություն։ Shtigen Group-ի հետ համագործակցությունն այս նախագծի շրջանակում շարունակական բնույթ է կրելու․ զարգացման վեկտորները շատ են, և մենք պատրաստվում ենք ընդլայնել աջակցության հորիզոնները»,- նշել է Համբարձում Դանելյանը:

Ուսումնարանում սովորում է շուրջ 120 պատանի ոչ միայն Մարտունի քաղաքից, այլև մերձակա համայնքներից: 3-ամյա կրթությունը մասնագիտական 7 ուղղություններով է՝ «վարսավիրական արվեստ և զարդարային դիմահարդարում», «կարի արտադրության տեխնոլոգիա», «հարդարման և շինարարական աշխատանքների իրականացում», «հասարակական սնունդ», «տրանսպորտային միջոցների շահագործում և նորոգում», «գյուղատնտեսական աշխատանքների տեխնիկական ապահովում» և «մեքենաների ու մեխանիզմների էլեկտրասարքավորումների տեխնիկական շահագործում»:

Արևային սարքերը տարեկան կխնայեն մոտ մեկ միլիոն դրամ, որով ուսումնարանը կհոգա իր` հատկապես պատերազմից հետո ավելացած կարիքները։

TelCell-ը «Արևածագ Արցախում»-ին միացել էր դեռ ամիսներ առաջ՝ հնարավորություն ստեղծելով նախագծին նվիրատվություններ կատարել նաև Telcell տերմինալներով և Telcell Wallet էլեկտրոնային դրամապանակով։
 
«Արևածագ Արցախում» նախագծի նպատակն է արևային էներգիայի օգտագործմամբ Արցախում հաստատել էներգետիկ անկախություն և անվտանգություն։